Articule passate
9° CURZO 'E LENGUA E CCULTURA NAPULITANA
LUNNEDI' 7 'E OTTOMBRE 2024 ACCUMMENCIAJE 'A 9^ EDIZZIONE D' 'O CURZO 'E LENGUA E CCULTURA NAPOLITANA, CHE TENGO A LL'UNITRE 'E NAPULE, CHE S'E' CUNCRUSO A GGENNAJO 2025. P'AVE' CCHIU' NNUTIZZIE:
|
'A GAVINA VOLA
|
NA GAVINA...PUZZULANA16.02.2023 - 'A gavina 'e Sepulveda - tradutta 'a Claudio Pennino - è vvulata pure a Ppezzulo.
Dint'a na libbraria-caffetteria s'è parlato 'e comme s'ha dda traducere nu capolavoro spagnuolo, però pure 'e ammicizzia, 'ncrusione, deverzetà e identità. L'attrice Chiara Esposito ha liggiuto quacche paggena d' 'o libbro, Claudio Pennino ha cuntato comme s'è arrivate a chesta traduzzione e Ermete è tturnato a pparlà 'e comme è necessario pruteggere e dda' cchiù valore a cchella lengua napulitana sempe cchiù currotta e talianizzata. S'E' CUNCRUSO 'O CURZO 'E NAPULITANO
30.01.23 - E' fernuto ogge 'o curzo 'e Lengua e Ccultura Napulitana a ll'UNITRE 'e Napule c'aggio tenuto tutte 'e lunnedì - d' 'e 9:00 e ppe n'ora scarza - a ll'Aula Vivarelli, via S. Maria d' 'a Libbera n° 34.Doppo 12 lezziune, 'o curzo s'è cuncrùso cu nna prova scritta, pe vverificà 'o leviello 'e cumpetenza lenguisteca 'e chille che partecipajeno. A ttuttequante è stato cunzignato 'o Diploma 'e Lengua Napulitana (foto).
LENGUE RIGGIUNALE?
|
|
|
Cerca pure 'ncopp'a: https://www.quotidianonapoli.it/author/ferraro/
ALLAMENTARSE NUN
|
E PPERO'...
10.04.2021
“Doppo Pasca, vieneme pesca”, se diceva anticamente, pe ffa capì ca ’e ccose, dopp’ ’a risurrezione, pônno sulo cagnà e nniente po’ essere comm’apprimma. E pperò…’a situazzione sanitaria nu’ ppare overamente cagnata manco doppo ’e cchiusure raffurzate ’e ’sta Pasca pittata ’e russo. Ô ccuntrario, sta muntanno ’arraggia d’ ’a gente che, doppo n’anno ’e sparpetuo, nun ce ’a fanno cchiù a ssuppurtà ’e ccunsequenzie d’ ’e guaje che ll’epidemia pruvucaje a ll’economia, â cultura e â vita ’e tutt’ ’e juorne. Oramaje ce stanno poca gente che ccuntinuano a ccredere ca “andràtuttobene” ....>> 'A MEMMORIA D' 'E TRASPUORTE
20.03.2021 <<Ê 31 d’uttombre 2019 ascette ’ncopp’ô giurnale “napoli” n’articulo d’ ’o mio ’ntitulato: “ATAN…A MMO”, addò facevo nu pucurillo ’e storia, accummincianno d’ ’o 1876, quanno ’o belga Edouard Otlet funnaje ’a SATN (Société Anonyme des Tramways Napolitains). ’E primme tramme napulitane (chiammate pure ‘trammuasse” ’a ll’ingrese ‘tramways’) jevano d’ ’a Turretta ô Chiatamone e tturnavano arreto. Doppo ’o 1918 passajeno ’mmano ô Cummune ’e Napule e ô 1929 ’a Succità d’ ’e tramme (ATCN) teneva già 39 linee cetatìne, 10 ’e fore-cetà e 2 speciàle, pe gghì ’Agnano. Fuje dopp’ ’o siconno dopoguerra...>>
'O QUATERNO D' 'E LLAGNANZE...
28.02.2021 <<Primma d’ ’a Rivoluzzione Franzese s’erano ’nventate nu sistema pe ffa’ arrivà ô Rre ’e llamentazzione d’ ’o populo pe cchello che nnu’ gghieva buono int’ ’e ppruvincie d’ ’o Regno. ’E ‘Cahiers des doléances’ erano na raccoveta d’ ’e llagnanze d’ ’a povera gente - ma pure d’ ’a borghesia e perzì ’e nobbele e cchièrece - che venevano trattate ’a ll’Assemblea d’ ’e State Generale. Però doppo 250 anne ’nce sta ancora chi penza c’ ’o mmàssemo d’ ’a partecipazzione democrateca che se po’ ccuncedere â gente è cchella ’e s’allamentà… Dico chesto pecché ’ncopp’a ll’edizzione napulitana ‘online’ d’ ’o giurnale ‘la Repubblica’ è ccumparza ’a rubbrica “’E vvoce d’ ’e quartiere”...>>
LL'ANNO 'E DRAGHI? NO, D' 'O VOJE...
12.02.2021 <<Vuje forze manco ’o ssapiveve ca mo mmo simmo trasute int’a ll’anno d’ ’o Voje (o Vùfero), animale sìmmolo ’e cuòccio e fforza d’anema. Però ’o ssapevano buono ’e 12.500 Cinìse che stanno ’nCampania, cchiù ’e 9.500 sulo a Nnapule e ppruvincia. ’Nfatte, accummincianno d’ ’e cinch’ ’e sera ’e miercurì 11 ’e febbraro, festiggiajeno pure a Nnapule ’o Capo ’e ll’Anno lloro, cu nn’evento urganizzato ’a ll’Istituto ‘Confucio’ e ll’assuciazzione ‘Ciao Cina’, patrucinato d’ ’o Cumune ’e Napule. ’Nc’è stato pure nu bellu spettaculo cu ccanzone cinese e nnapulitane, balle cu ’e ttammorre e nnu cullegamento cu Ppechino e Wuhuan....>>
'A CASERMA NUNN'E' NA SCOLA !
30.01.2021 <<Dopp’ ’a riuscita d’ ’O Culleggio, ’e ccape d’ovo ’e Rai 2 penzajeno buono ’e cuntinuà cu nnu ‘reality’ addò guagliune/one d’ogge – rebbelle, venciute, casinare e ttecnologgiche - se truvassero a ppassà quacche semmana d’ ’a vita loro int’a nn’istituzzione autoritaria, addò nun ce stanno deritte ma sulo duvere e ll’ubbedienza è l’unneca vertù. Fin’a cché se trattava ’e nu culleggio, però, chist’esercizzio furzato â disceprìna puteva pure avé senzo, pecché – bene o male – serveva a ’mpararle a ccampà assieme e a studià seriamente. Mo però nun se tratta cchiù ’e fa’ pratteca d’ ’o rispetto d’ ’e rregule ’e na cummunetà, p’addiventà cchiù attiente ê prufessure e ssulidale c’ ’ o riesto d’ ’o gruppo. Cu ’A Caserma, ’mméce, ’a Rai s’è gghiuta a ’mpantanà ...>>
ICONE E MMURALE: ASCIMMO D' 'O VVIRTUALE
16.01.2021 <<’A nu poco ’e tiempo, a Nnapule ’a vita culturale e ppuliteca se sta appassulianno e asseccanno semp’ ’e cchiù. Certamente l’epidemia ’e Covìdde ha ddato na bella botta, facenno parlà giurnale, radio e ttelevisiune sulo ’e malatìe, cuntagge e vvaccine e ffacennoce campà dint’a na ’mbolla ’e sapone disinfettante e ccu ’e ffacce annascuse addereto ê mmascarine. Però nun ce ’a putimmo piglià sulamente cu ’a pandemia e cu ll’emergenza sanitaria. ’Nce sta quaccosa – e ddipenne sulo ’mparte d’ ’e lìmmete che sso’ state mise – che cce sta arreducenno a ppersone semp’ ’e cchiù apprennetive e rrassignate a ccampà juorno pe gghiorno, senza manco … >>
UCRAINAPOLI: ISSO, ESSA E...
12.12.2020 <<Po’ essere ca quaccuno ’o ssapeva già, però fa na certa ’mpressione scuprì quanto cuntava na vota Napule e ’o regno sujo, pure for’a ll’Italia. Ogge, nuje napulitane canuscimmo l’Ucraina e ’a pupulazzione soja quase sulamente pe mmezza ca tenimmo na cummunità ’e faticature ucraine grossa assaje. ’E statistiche d’ ’o 2019, ’nfatte, ce fanno sapé ca sulo a Napule cità se cuntavano 8.755 ucraine. Int’a ttuttaquanta ’a cità metropoletana se nne cuntavano 23.337 (’o 10% ’e tuttequante ll’ucraine d’Italia), specialmente a Ggiugliano (1.149), Somma V. (488), Marigliano (419) e Acerra (415). ’Nzomma, si ll’ucraine che stanno mo â pruvincia ’e Napule se mettessero assieme, putessero furmà nu cummune cu ’a pupulazzione ...>>
MASCARE E MMASCARINE
28.11.2020 <<Me capitaje ’e leggere n’articulo interessante ’ncopp’ê mmascarine c’ausammo tutt’ ’e juorne pe cce pruteggere d’ ‘o cuntaggio. Se spiegava ’nfatte comme facimmo a ccanoscere chelle ‘verace’, che cce pônno da’ cchiù ssecurezza. ’Sti mmascarine – chelle ‘chirurgeche’ comm’a ccchelle ‘filtrante’ – oramaje ’e pputimmo truvà a ttutte parte, però nu’ ssongo tuttequante secure e ccertificate. Pecchesto, buono facimmo a gguardà chello che sta scritto ’ncopp’â cunfezzione, cuntrullanno si ’nce stanno ’e ddiciture juste e ’o marchio CE, e si rispettano ’e nnorme UNI EN 14683:2019 o UNI EN 149:2009. Però nun ve voglio parlà ’e ’sti fatte, che ssongo ’mpurtante ma assaje tecniche. Chi me canosce sape ca chello che m’interessa assaje e mme cellechéa ’o cerviello songo uriggene e storia...>>
FA' SPESE: NA SFIDA 'A COGLIERE
07.11.2020 <<Me capitaje scasualmente sott’a ll’uocchie na revista pubblecata ’a n’assuciazzione ’e cunzumature (*), addò ce steva n’articulo ’ntitulato: “Che sfida la spesa”. E a ffa’ ’a spesa è overamente na sfida pe ttuttequante, pe vvia ca quanno, dove, pecché e ccomme accattà quaccosa è una d’ ’e ppoche scévete c’ogne juorno ce attoccano. Però spisso nu’ ttenimmo bastantemente cunto ’e ’stu fatto, accussì nunn apprufittammo ’e ll’occasione ’e decidere nuje a cchi vulimmo da’ ’e sorde nuoste, e ’ncagno ’e cosa. Na puliteca attenta a ll’ambiente, â salute e ppure ê deritte ha dda tené cunto d’ ’o fatto ca, si nun simmo tuttequante faticature e pprudutture, tuttequante però simmo cunzumature. Pirciò chello che ffacimmo (o nu’ ffacimmo) quanno...>>
GUARDIE CIVICHE E SSURDATE 'E GUARDIA
21.10.2020 <<Nun saccio si pure vuje, ma io, passiànno’mmiez’a ttavuline, gazzebe e bbancarelle e scanzanno ’e mmachine parcheggiate a ddoppia e ttripla fila e ppure ’ncopp’ê strisce pedunale, spisso m’addimando: “Neh, ma ’e viggile addò so’ ffernute?”. A Nnapule, ’a terza cetà d’Italia cu quase nu milione d’abbitante, ’e guardie munecipale pareno overo scumparze. Cu cchello che sta succedenno e ccu tutt’ ’e rreole ordinanze e ddecrete pe vvia d’ ’o Coronavirùsse, nuje penzavemo ca ’nce sarriano state cchiù pperzone p’ ’e ffa rispettà, cuntanno aggente ‘e pulizzia statale, carabbiniere e gguardie municipale. E ’mmece ’o guverno e quacche presidente ’e Riggione se stanno ’ncapunénno...>>
'O SURDATO... 'NZAMMURATO
10.10.2020 << Ce stammo abbituanno, però nunn è na cosa normale. ’E ccittà noste so’ ppresidiate juorno e nnotte ’a surdate armate comme si jessero â guerra. Annanze a stazziune, chiesie, munumiente e ppalazze ’nce sta spisso parcheggiata na camiunetta o pperzì nu blindato, cu ssentinelle c’ ’o mitra a ttracolla che se guardano attuorno, comme cumbattiente ’e primma linea. Overamente già nunn era normale quanno, pe mmezza d’ ’o virùsse, ’nzerrajeno città sane e ’nce mannajeno nu cuofeno ’e surdate pe ccuntrullà ’e ‘zone rosse’. Ogge, però, vônno adderittura mannà ’e surdate a ccuntrullà si ’a gente teneno o no ’a mascarina ’ncopp’ô musso e ssi se stanno affullanno e ffanno ammuina ’nnanz’ê lucale d’ ’a muvida. Ce manca sulo ca ce truvammo militare armate pure dint’ê ...>>
TERRA: SPREMMUTA E SSACCHIATA
05.09.2020 - «Stammo spremmenno ’e rresorze d’ ’o Chianeta. Spremménnole comme si fosse nu purtuallo. Paìse e ’mprese d’ ’o Nord se songo arreccute sfruttanno ’e ddote naturale d’ ’o Sud, pruducenno nu ‘debbeto ecologgico’. Chi pavarrà ’stu debbeto? E ppo’, ’o debbeto ecologgico s’aggrannisce quanno ’e mmultinazziunale fanno – fora d’ ’o Paese lloro - chello che lloco ddinto nunn ll’è ccunzentito. Chesto ce ’ncujéta. Ogge – no dimane – ogge ce avimm’ ’a piglià cura d’ ’o Criato cu rrispunzabbelità. Priammo pecché ’e rresorze d’ ’o Chianeta nu’ ssiano sacchïate, ma spartute ’e na manera justa e rrispettosa. No a ll’accuppamiento, sì â spartenza!»
’Sti pparole nun songo d’ ’e mmeje, ma l’ha dditte Papa Francisco, cu ll’accasione d’ ’o mese addedecato â prutezzione d’ ’o Criato (1° sett. - 4 ott.). Comme sempe, so’ pparole ...>> DUJE AMMIRAGLIE, CARRECHE 'E CEMMERAGLIE...
03.08.2020 - “I due colonnelli”: accussì se ’ntitulava nu film ’e Steno d’ ’o 1963, addò chillu genio ’e Totò faceva ’a parte ’e nu culunnello ’e ll’esercito taliano che, justo â viggilia d’ ’a caduta d’ ’o reggime ’e Mussulino, se truvaje a occupà nu paesiello grieco addò primma stevano ’e ttruppe ‘ngrése, cummanate d’ ’o culunnello Henderson. Nu film tennero e spassuso addò, ô finale, pure ’o culunnello Di Maggio truvarrà ’a manera ’e se riscattà, a ffronte d’ ’a ferocia nazzista d’ ’o novo occupante, ’o maggiore germanese Kruger. Sì, propio chillo che, tutto ’nquartato, alluccava…>>
MARE: BENE CUMMUNE ?
20.07.2020
« “E ’nterra â rena sciatava ’o mare…” (Ferdinando Russo, ’O luciano d’ ’o Rrè - 1910) ’Sti vierze, comme succede sempre quanno a Nnapule se parla d’ ’o mare, so’ cchiene ’e puisìa. O almeno succedeva na vota, quanno se scriveva: “…l’onna chianu chiano / vasa ’a rena e ppo’ scumpare” (G. B. De Curtis e E. De Curtis, 1011), e sse senteva dicere ’stu pruverbio: “Chi a ffemmene crede, ara ’o mare e semmena ’a rena”. Però, cu ttutte ’e prubbleme che cce stanno pe mmezza d’ ’o Coronavirùs, mo parlà ’e mare e spiagge purtroppo è addeventato n’argumento assaje delicato e ppe nniente puetico. Distanze ’e sicurezza ’a rispettà, puoste ’a prenotà, mascarine chirurgeche ammescate cu ’e mmascare pe nnatà sott’acqua, ammacaro pure docce cu ’o ggell ... >> NA SCOLA...COVIDDIOLA ?
03.07.2020 <<’Mmiez’a tutt’ ’e guaje che cce purtaje ’sta pandemia, sicuramente na bella botta se l’è ppigliata ’a scola, che ggià primma nun steva scarza a pprubleme. ’Nzerrata pe cchiù ’e tre mmise, aspettanno p’arapì ’e pporte â siconna mità ’e settembre, ’a scola nosta ha fatto ’e cunte cu na trasfurmazzione grossa assaje, che, pe ppruteggere ’a salute ’e studiente e pprufessure, l’ha ppurtate a ffa’ lezzione ’a luntano, ognuno â casa lloro. ’Sta specie ’e ’struzzione a ddomicilio, però, nu’ ttene niente a cche vedé c’ ’a scola verace, che nnu’ sserve sulo pe ’mparà ’a storia, ’a matematica o l’ingrese, ma pure pe ffà sta’ assieme guagliune e gguaglione, educannole ê rreole e ffacennole addeventà perzone e cetatine....>>
"SI N'HAIE DENARE, TU IETTA COPPE"
18.06.2020 - <<So’ ppassate 400 anne ’a quanno Giambattista Basile scrivette ’sta frase dint’a uno d’ ‘e famuse Cunte suoje. Però me pare ca putarrìa ji’ bbuono pure mo, pecché – pure si nun stammo parlanno d’ ’o juoco d’ ’e ccarte – vale sempe ca quanno scarzeano ’e denare, ce âmm’ accuntentà…d’ ’e ccoppe. Pe ccarità, stammo tuttequante allere, priate e ccuntente pe vvia c’ ’o Napule ha vvenciuto ’a Coppa Italia e ssicuramente ce vuleva, doppo nu periodo accussì ddifficile e scuro. Infatte, aspettavemo tuttequante ca se turnava a campà normalmente, libbere d’ascì d’ ’a casa pe ffa’ tutto chello che facevamo primma d’ ’a pandemia. Però ’e nnutizzie che lleggimmo...>>
NAPULE CETA' APERTA ?
28.05.2020 - <<Sittantacinche anne fa ascette Roma città aperta, nu capolavoro d’ ’o cinema taliano, cu ’a reggia ’e Rossellini e ’nterpretato ’a atture eccezziunale, comme A. Magnani e A. Fabrizi. Mo però pare ca stanno appriparanno n’atu bellu filme: Napule cetà aperta, diretto d’ ’o sinneco Luiggi de Magistris. Stess’isso, ’ntervistato d’ ’o Curriere d’ ’a Sera ha fatto ’sta bella ’mmasciata, cundicenno: “Int’ ’e juorne che vveneno farraggio ’na serie d’ordinanze p’arapì l’attività ’e Napule 24 ore ’ncopp’a 24. Niente cchiù barrette furzate a ’nzerrà ’e pporte ê 23, niente cchiù orarie pe nnisciuno!”. Isso dicette pure ca risturante, puteche, servizzie, ciardine...>>
FASE DOJE: 'A RIPARTENZA...
15.05.2020 <<Nunn è ffacile, ’e ’sti tiempe, a ttruvà argumiente pe scrivere articule che nu’ tteneno a cche ffa’ c’ ’o Coronavirusse. Pareva c’ ’o munno s’era ffermato, comme si ll’ati pprubbleme fossero scumparute o se putessero leggere sulamente â luce ’e chistu fraggiéllo. Ma pure mo, quanno poco ce manca â fase doje che c’avarria fa’ ascì fora d’ ’o tunnél ’e l’emergenza, simmo ancora martellate ’a nutizzie che tteneno a cche vveré cu ll’epidemia. L’uneca differenza è cca pparlano ’ncopp’a ttutto d’ ’e guaje ...>>
'A NURMALITA' E' 'O PRUBBLEMA...
29.04.2020 - È overo nu periodo strevuzo. ’A doje mise pare quase c’ ’o munno s’è ffermato: s’è astregnuto d’ ’o punto ’e vista giografeco e s’è arredutto ’a chillo d’ ’a narrazzione d’ ’e fatte. Però ’stu curnuto ’e coronavirusse – ’mmiez’a ttante guaje che s’è ppurtato appriesso – forze facette pure na cosa bona. Ce ave fatto sentì tuttequante perzone umane, cetatine d’ ’o munno, no taliane, francise, cinìse, mericane o brasiliane. Perzone che sse credevano putiente, ma erano fraggile, suggette ’a nu cusariello invisibbile che ce po’ pure atterrà, stutannoce all’intrasatto comm’a ccannele, e che comunque ce ave custretto a cciuncarce â casa comme carcerate, cagnanno ’e subbeto ’a vita nosta. È stato comme si na fattucchiara ce avesse fatto na fattura…Bell’e bbuono so’ scumparze mure e ccunfine.....
'A RECCHIA VERDE 'E G. RODARI
15.04.2020
NU SIGNORE AMMATURO CU NA RECCHIA ACEVERA Nu juorno, ’ncopp’ô diretto Capranica-Pontevera Vedette n’ommo cu na recchia acèvera. Nunn’era assaje giovane ma era ammaturato Tutto, ’a for’ ’a recchia, acèvera restata. Cagnaje subbito ’e posto, pe lle sta’ accanto pe mme studià ’o fenomeno, cu nnu poco ' spanto. “Signò – diciett’io – na ciert’età tenite Ma ’e chella recchia verde che vve ne facite?” Rispunnett’isso: “Dicite pure viecchio ’e giovene rummane sulo chesta recchia. FRONNA 'E CURONA...
02.04.2020 - Passajeno nove mise ’a quanno scrivette n’articulo pe ’stu giurnale, ’ntitulato: “’O frutto culurito è ’mmelenato…“, però nisciuna nuvità è nata e mmanco s’è cagnata na situazzione ch’era ggià assaje defficele. Ma si tanno era ’ncopp’a ttutto na quistione iggienica e d’ ’o rispetto d’ ’a legge, mo, pe ccomme stammo cumbinate cu ll’epidemia ’e Coronavirusse, è ancora ’e cchiù nu prubblema che ttocca ’a salute e ’a sicurezza pubbleca. Fatt’è ca, pure si tuttequante ce âmm’a sta’ accuorte a nnun ascì ’a casa senza mutivo e a cce pruteggere cu gguante e mmascarine, paricchie verdummare e pisciavìnnole cuntinuano a ttené ’e mmercanzie spase p’ ’a via, fora d’ ’e pputecche lloro...
SFILANNO 'A CURONA D' 'E DITTE
19.03.2020 - #1. Aniello ca nun se pava nun se stima – Ce ne stammo addunanno int’a ‘stu brutto periodo d’epidemia. ‘A verità, ’o servizzio sanitario nazziunale nun ce ’o ddanno pe ssenza niente e quase tuttequante pavammo pe ll’avé. Però sulo mo stammo capenno overamente che vvo’ dicere tené n’assistenza sanitaria pubbleca che, cu tutt’ ’e lemmete suoje, ha ssaputo piglià ’e pietto ’sta mardetta malatia, facennoce stimà pure ’a ll’ati Paise.
#2. L’amico è comm’ ’o ’mbrello: quannno chiove nunn ’o truove maje – ‘Ntiempo ’e guaje, se sape, spisso pure ll’amice scumpareno. Cu ll’emergenza, ’a na parte nu cuofeno d’amice virtuale ce mannano messaggine ... ESSERE (OVERO) NAPULITANE
05.03.2020 - ’Ncopp’ô ‘Matino’ ’e dummeneca passata aggio truvato na spassosa intervista che Titta Fiore facette a Vvicienzo Salemme: “Che ffatica a essere Napulitane Verace”. Leggennola m’è subbeto vvenuto a mmente ’o primmo d’ ’e trentacinche articule ‘nNapulitano ch’aggio scritto fin’a mmo pe ’stu ggiurnale: “Nun è na cosa semprece essere napulitane”. L’êvo ’ntitulato accussì pecché parlava ’e comme l’identità napulitana sta currenno ’o riseco d’essere scancellata d’ ’a globbalizzazzione, doppo nu seculo e mmiezo ’e culunizzazione vestuta ’a ‘unnetà d’Italia’. Tanno arricurdavo, citanno ô pueta siciliano Ignazio Buttitta, ca nu populo addeventa overamente povero - e sse perde pe ssempe - quanno se fa’ arrubbà pure ’a lengua soja...
'A RIMEMBRANZA...D' 'O PARCO
21.02.2020 - ’A nutizzia bona è c’a Pusilleco arape n’ata vota ’o Parco Virgiliano, che steva ’nzerrato ’a tre mmise, doppo che s’era schiantato nu pino. ’A nutizia malamente è ca però nun arape sano sano ma sulo ’mparte e cc’a ll’appello ’nce mancano pure 70 arbere. L’assessore cummunale ô Vverde ha spiecato ca mo ll’arbere stanno ’nsicurezza e ca s’è ffaticato assaje p’accuncià ’o murillo d’ ’o campo sportivo (sfravecato d’ ’o schianto d’ ’o pino), pe ssistimà ’e prate e pe mmettere a pposto cunnutte e ssajittere. Pare c’àveno accunciate perzì ’e ggiostrine pe ffa pazzià ’e ccriature…Pe ccarità: sta cosa ce fa sulo piacere, specialmente si penzammo a comme s’è arridutto ’o vverde....
D’ ’O NOCE ô NUCILLO. D’ ’O SABBA ô SABBAT'A SSERA
13.02.2020 - “Tremmate, tremmate: ’e gghianare so’ tturnate!”, alluccavano pe pprutesta ’e ffemministe ’e ll’anne Sittanta. Ogge però pare c’ ’a ggente se mettono cchiù appaura d’ ’e ffatture fiscale che d’ ’e ffattucchiarìe. Pure ’e guagliune/one se fanno affatturà ’a videojuòche e social media cchiù assaje ’e quanto se putevano fa’ appercantà tanno d’ ’e ’nciarme d’ ’e gghianare. Mo p’ammagà nu crestiano e pe ffallo fa’ chello che vvônno abbasta c’ausano ’e ppubbrecità – spalefecate o annascuse – accussì ce lavano ’e cerevielle, ce arravogliano e ce ’mpapocchiano buono e mmeglio. Nun lle serveno cchiù fatture, formule streveze, palle ’e vrito e bacchette maggeche. Mo s’ausano ll’algoritmi pe ssapé .....
'E CIARDINE ABBANDUNATE
23.01.2020 - Ê primm’anne d’ ’o Noveciento Ferdinando Russo scrivette na pecundrosa puisìa ’ntitulata ’O ciardino abbandunato, addò leggimmo: «Turnatevenne, pecchè nun è ccosa, / nun nce sta manco cchiù nu mandarino!/ Nun nce sta manco cchiù na schiocca 'e rosa, /manco ’e ffronne nce stanno, int’ ’o ciardino! […] Cuglienno frutte, scarpesanno sciure, / sceppanno ’a terra ’e ggiglie mprufumate, / vi’ che m'ha fatto? E, nun cuntenta, pure / ’e fierre d' 'o canciello ha sturzellate! […] Chisto, ch'era ’o ciardino d’ ’e ciardine / da quacche mese è addeventato niente. /...».
NU MUSEO 'E NAPULE TUTTO
|
'E 'MMANE 'MPASTA
14.10.2019 - ’Ncopp’ô ggiurnale 'e lunnedì 14 ’ottombre ’nce steva nn’articulo 'ntitulato “La pasta: l’oro di Napoli “. E overo parlammo 'e nu trisoro, si 'a pruduzzione 'taliana 'e pasta rummàne 'a primma 'e tuttequante (3,36 meliune 'e tunnellate, quase 2 meliune spurtate) e ssi sulo int’ 'a Campania 'nce stanno 500 azziende che ppruduceno pasta 'e primma qualetà. Int’a Cetà Metropolitana 'e Napule tenimmo 166 stabbelimiénte e, 'nfi’ d’ 'o XV seculo, âmmo sempe avuta 'a tradezzione antica e nnobbele d’ 'e màste pastare. Ô 1878, sulo a Ttorre â Nunziàta, 'nce stevano 85 muline e 125 pasteficie...
|
TRASPUORTE: ATAN... A MMO
31.10.2019 - Napule fuje una d’’e pprimme cetà che ttenevano nu servizzio ’e trasporto prubbeco. ’Nfatte, ô 1876, nu ’mprennetòre belga - Edouard Otlet - funnaje ’a SATN (Société Anonyme des Tramways Napolitains). ’E primme tramme partevano d’’a Turretta, passavano p’’a Riviera ’e Chiaja, arrivavano abbascio ô Chiatamone e ppo’ tturnavano arreto. Spisso ’e Napulitane pazziajeno cu ’sstu nomme sfranciuso, c’addeventaje ’mmocca a lloro tramme, trammuè e trammuàsse, trasenno a ppoc’â vota perzì int’’e viérze d’’e ppuisìe ’e Di Giacomo, Russo, Viviani o De Filippo. Capitava pure c’’a ggente ’e Napule ausavano ’sta parola...
|
LA FIERA DE MAST'ANDRE'
10.10.2019 | So’ ppassate na decina ‘e juorne ‘a quanno âmmo fatto festa, allicurdanno ‘e ggroliùse Quatto Jurnate ‘e Napule. Eggià, pecché ‘a nosta fuje ‘a primma cetà che sse libberaje - essa sola e ccu na resistenza ‘e populo - d’ ‘a superchiaria viulenta ‘e ll’esercito germanese, che tteneva ‘ntenziòne ‘e appiccià e ddestrujere Napule sana sana. ‘A verità, nun è ca ‘e ggiurnale e ll’ati mmedia se songo addedecate assaje a allicurdà comme ‘e Napulitane se sapettero libberà ‘a l’accupazzione nazzista. Spisso, però, se parla e sse scrive d’ ‘o lungomare libberato ‘e Napule, e cchiù spisso ancora se nne va fruscianno l’Amministrazzione Cummunale....
NA LEGGE P' 'O NNAPULITANO
01.07.2019 | Diceva nu ditto antico: “Trica, ca vvene pesante”, pe ssegnificà ca spisso s’ha dd’aspettà assaje tiémpo e ss’àven’ 'a abbèncere nu cuòfano 'e ‘ntuppe si sse vo’ uttené nu resultato 'mpurtante. È cchello che ssuccedette quanno 'o Cunziglio Reggiunale d’ 'a Campania appruvaje finalmente 'a “Pruposta ‘e legge 'ncopp’â tutèra e 'a valurizzazzione d’ ' lengua napulitana”. So’ ppassate cchiù 'e trè anne 'a quanno partecipiàje ô Gambrinus â ccummersazzione p’ 'a stampa urganizzata 'a Francesco Emilio Borrelli, 'o cunzigliere reggionale d’ 'e Viérde ch’êva firmato chella pruposta...
|
SI 'A FATICA FOSSE BBONA...
03.10.2019 | A Nnapule – 'o ssapimmo tuttequante – 'a parola pe ssegnificà “lavoro” è “fatica” che, ccu 'o verbo “faticà”, ce fa capì bbuono ca pp’ 'a ggente nosta s’è ssempe parlato 'e nu sfuòrzo, nu patemiénto. 'A soccia cosa succede però p’ 'o sseciliano “travagghiu”, p’ 'o ffrancese “travaille” e p’ 'o spagnuolo “travajo”, parole che vveneno d’ 'o llatino e cce parlano 'e turmiénte, spanteche e ddulure. Nun ce scurdammo ca ppure 'a parola ‘taliàna “lavoro” vene d’ 'o llatino “laborare” e vvo’ dicere: suffrì, penà, sta’ mmalato. N’ata cosa curiosa è c’ 'o partecipio passato d’ 'o vverbo latino “fatigare” è… “fessus”, che vvo’ dicere: scellato, sfatto, sfessato...
CURNUTE E MMAZZIATE !
08.07.2019 | ‘Ncopp’ê ggiurnale stanno parlanno assaje 'e nu fatto che, però, nu’ ppare c’ 'a cchiù pparte d’ ‘a ggente àveno capito overamente. 'A Repubblica Taliana già teneva int’ 'a Custituzzione soja, a ll’art. 116, 'e reggiùne a statuto speciàle’, però cu 'a reforma d’ 'o 2001 'nce trasette dinto pure propio chella ‘autonomia devierzefecata’ che Llumbardia, Veneto e Emilia-Rumagna vanno cercanno, e cche manco ô Piemonte lle dispiace. 'Nzomma, pare propio c’ 'o Nnord sano sano se sente accussì ttanto speciàle ca sta cercanno 'e fa’ stabbelì pe llegge 'a devierzetà soja.Quaccheduno parlaje 'e na “spartènza d’ 'e ricchepellune”...
|
(C) 2023 ERMETE FERRARO | RIPRODUZIONE SOLO SU RICHIESTA
WWW.ERMETEFERRARO.ORG | [email protected] | +39 3493414190
WWW.ERMETEFERRARO.ORG | [email protected] | +39 3493414190